मन माझे

मन माझे माझ्यावरती रूसून फुगून बसले
मन माझे माझ्यावरती रूसून फुगून बसले 


म्हणने त्याचे माझ्या, म्हणे कृतीत उतरत नाही
लोकांची घेऊनी भीती, मी स्वप्नच चित्रत नाही
मनास पटले नाही, माझे हे भेकड वागणे
जगण्यासाठीच केवळ, मनास मारून जगणे
अंतर्गत रहिवाश्यास बाहेरचे ना दिसले
मन माझे माझ्यावरती रूसून फुगून बसले ॥1॥

मज आता ऐसे वाटे, मन काढून घ्यावे हाती
निरखूनी त्यास बघूदे, जगण्याच्या चाली-रीती 
भावनांच्या जालात, मन अलगद जाऊन फसते
स्वत:चे मन राखल्यास, इतरांचे हिरमुसते
मनासाठीच सारे, मनाने हे सोसले
मन माझे माझ्यावरती रूसून फुगून बसले ॥2॥