पुन्हा एकदा ......

नजरेसंगे नजर मिळू दे पुन्हा एकदा
प्रेमाची त्या नशा चढू दे पुन्हा एकदा

लखलखणारा चांद उगवता नभोमंडपी
 लुकलुकणारे तारे नडू दे पुन्हा एकदा

गालावरची हलेल बट अन सुटेल वारा
वाऱ्यावरती मना उडू दे पुन्हा एकदा

गोड गुलाबी ओठांनी त्या हळूच हसता
आकाशाला लाट भिडू दे पुन्हा एकदा

पैंजनीचा नाद उमटता कानी छुनछुन
अंतरातले सूर जुळू दे पुन्हा एकदा

आठवणींची होऊनी शाई रंगले कागद
शब्दा शब्दा दाद मिळू दे पुन्हा एकदा


-- शब्दप्रेमी
(विवेक कापगते)
12.06.2014