------ जागा --------

तुम्ही बसने अर्थात आपल्या एस.टी. ने प्रवास केला असेलच..

कधी तुम्हाला आला का हो असा अनुभव??

किती उशीर झालाय
अजून आली नाही बस
स्टॉप वर उभा राहण्यात
लागतो किती कस

सगळी जण कशी
घामानेच न्हाली
कुणीतरी ओरडलं
अरे बस आली

मग सुरू होते
आयुष्याची रेस
तिथे दिसते संस्कृती
तिथे दिसतो देश

सीट मिळवण्यासाठी
कुणी टाकतो रूमाल
छोटा बाळ टाकणारे
माय बाप कमाल

तरणेताठे युवक
जागेसाठी भांडतात
छोट्याशा बसमध्ये
संसद जणू मांडतात

प्रवास होतो सुरू
संपून बाय बाय
थरथरणारा आवाज येतो
थोडं सरकता काय??

कुणी लक्षच देत नाही
कुणी टाळतो द्यायचं
न विचारता सांगतो
'इतक्या लांब जायचं'

इतक्यात कुणीतरी
स्वताहून उभा होतो
हसरी मुद्रा करुण
आपली जागा देतो

न बोलता सांगून जातो
अरे माणूसकीने वागा
उभा राहून व्यापून घेतो
मनातली थोडी जागा

- विवेक
२६.०४.१६