बघ तू ......

मनातली गाठ भीतीची खोलून बघ तू
मनापासून मनातले चल बोलून बघ तू

कुठवर शोधत बसशील चपला ,सँडल
अनवाणी पायाने पण चालून बघ तू

हृदयातील गोदाम भरतील समृद्धीने
विश्वासाचे चार बियाने पेरून बघ तू

बघताक्षणीच गळून पडतील कैक फुले
बागेत जावूनी एकदाचे लाजून बघ तू

तुझ्यातले लहान मुल सापडेल कदाचित
खळखळून एकदा मित्रा हसून बघ तू 

नजरेने तू केल्या असतील लई शिकारी
शब्दांचे हे बाण एकदा झेलून बघ तू

--- विवेक कापगते, भंडारा
२१/१२/१६